最近見到中概一地雞毛，於是睇左啲產業資訊，刺激到我哋有個大膽9up（不負責任）猜想，就係中國互聯網巨頭（如ATM)下一步會點重大轉型？ 推測係「Alphabet 」(Google)架構模式，原因如下：產業思維，科技創新才是王道
中國最新「共同富裕」框架形勢下，壟斷肯定無出路，政府要各大企業唔好再只諗自身股東利益，而要為先進前沿科技生態做出貢獻，要摒棄「企業思維」，改為做「產業思維」。意思即係做大中國最尖端科技生態圈，不過政府唔係太care單一公司嘅生死，反而係關心「產業發展」，例如產業鏈有冇先進核心技術/價值？能唔能夠避免被卡死？甚至能夠反制？
再直接D講，就係唔鼓勵企業做「商業模式」創新，改為專注做「科技技術」創新。大家唔好再迷戀傳統「護城河」理論，即係用平台優勢燒錢搶流量搶市佔，然後向每一個使用者收費(智商稅)，再蠶食其他玩家轉移財富。而家中央大力鼓勵不斷透過研發技術去創造新科技，推陳出新，推動硬科技生態圈發展；由一家獨大「模式創新」轉為高科技公司「技術創新」，重視研發量產，帶起整個科技產業鏈公司共同協作生態。
参考得到app專欄>同埋>內容有提到合肥巿、重慶巿政府「招商投資」例子。
十幾年前，重慶巿政府睇到液晶面板產業鏈有缺口，想搵「京東方」落戶當地擴大產能，但係京東方唔夠錢去投資擴產，巿政府游說民企出資，可惜唔成功，最後由７間國企去支持政府嘅產業基金，兩年後大賺，證明左可行。
依個模式將國有產業投資基金作為VC（風險投資），去投資具有戰略發展價值的項目。成功的話甚至可能替代部分賣地收入作為財政收入來源，而且自己能夠掌握產業布局。
———————————————
互聯網巨企宜家係要轉型做「前沿科技生態圈」嘅領軍企業，就要好似小米咁有能力調動整合甚至帶動起整條產業鏈，融入地方政府戰略發展。但係小米最大弱點係核心技術唔強，中國真真正正有核心科技技術嘅大企業係「華為」，國家最希望就係每個科技技術領域都有一間「華為」。
宜家擺喺互聯網巨企面前得兩條路
就算揀後者發展，一時三刻無可能大舉更改業務主軸，所以比較可行嘅方式就係參考Alphabet (Google)改變公司架構方式，保留原有業務，設立子公司去探索唔同科技嘅可能性，假以時日將新業務成長為新增長曲線，亦為日後因為壟斷或者數據安全而被政府要求分拆嘅可能性做準備。
即係話互聯網巨企之後有機會高調成立某領域嘅硬科技公司，同某個地方政府深度合作，目標係符合國家發展成為該科技領域嘅「華為」，係當地做大生態圈，一旦宣布戰略升級轉型可能係股價長期趨勢反轉訊號。
最近見到騰訊同埋美團係一級巿場投資芯片產業，而阿里本身係有平頭哥芯片公司，不過未見佢有咩起色。我哋覺得互聯網巨企無高調宣布調整戰略主軸的話，巿場好難改變現時睇法。
大家都知Alphabet (Google) 做左好多年先係AI 同埋自動駕駛依兩個領域做到成績，宜家廣告收入依然係重要收入來源，所以會係慢慢長路嘅轉型。而百度依個例子係前車可鑑，戰略選擇出錯的話錯過一個大時代，再跨代轉型係舉步維艱。
唔知你哋又點睇呢？
＊文章獲 富L/窮S戒窮進化筆記 授權刊登，原標題為《ATM可以轉型做咩？》
免責聲明：本網刊載的所有投資意見，只可作參考用途。讀者在作出投資決定前理應審慎，並主動掌握市場最新狀況。若不幸招致任何損失，概與本網無關。而本集團旗下網站或社交平台的網誌內容及觀點，僅屬筆者個人意見，與本集團立場無關。本集團旗下網站對因上述人士張貼之資訊內容所帶來之損失或損害概不負責。
