由於今年嘅大環境係「高通脹，低增長，利息上升」，所以conviction係持有「價值型高股息」嘅股票尋求保值，但係呢一兩日烏俄大戰，令到市場有劇烈動盪，改變左每類資產嘅risk adjusted return，因此弩飛決定先行減倉止賺，等自己同大市消化完呢個衝擊，再重新部署。以下係呢一兩日考慮過嘅嘢：
- 「高通脹，低增長，利息上升」嘅情況屬於中線（至少都一年半載），唔係咁容易逆轉，但係戰爭通常係短期衝擊（研究指戰爭開始後，平均20日見底， 有一半情況1-3日就見底，40日後修復跌幅），所以原先嘅諗法係坐穩現時嘅持倉就ok
- 後來留意到中海油（883）同中國宏橋（1378）嘅走勢同預期有出入：國際油價同鋁價不斷破頂，但兩隻股票開始出現阻力，導致我諗：「雖然中線環境冇變，持倉股票基本面冇變，但戰爭會否構成另外更吸引嘅投資機會，導致資金重新執位」
- 第一個諗到嘅係原本預期美國10年期債息居高不下，近排有回調嘅情況，雖然冇盈利嘅增長股都只係有反彈冇升幅，但其實有好多GARP（Growth as Reasonable Price）嘅公司嘅估值進入左射程範圍
- 第二個諗到係美股同港股喺近一年都處於反比關係，而且今年其實大部份市場都係錄得10%左右嘅跌幅，唯獨是港股升咗一轉5-6%，對於戰爭之後嘅「反彈力」，香港市場會否同世界有唔同走勢？（例如美國反彈800點，香港都照跌100點）
- 第三個諗到係中國對戰爭嘅企位同國內行業變化會否影響「價值型高息股」之間嘅選擇：之前認為煤電企業雖然有新能源推升估值，但受制於煤電部份嘅盈利，依家煤價重新被限制向下，因此又要revisit呢個行業；一啲國有企業會唔會同俄羅斯有合作關係，導致環球資金一段時間抽離呢啲企業
- 上一篇文《第二隻腳？》提到有機會出現第二隻腳，但係如果第二個底係低於上一個底，其實呢啲叫跌穿⋯所以雖然指數未正式跌穿（科指就跌穿左），但係掂返上次個低位，都已經唔係咁好⋯因此第二隻腳嘅假設要打返個問號
總括嚟講，巴菲特都講：「唔好因為打仗而唔買股票」，我都好明白，但至於買乜嘢股票，我應該要再細心諗一諗，買錯咗仲衰過唔買⋯所以係諗明白之前，覺得唔應該用140%倉位去衝。幸好，雖然大市調整左唔少，但今年嘅PnL都係正數嘅⋯
(最後附送兩張圖表比大家參考吓）
＊文章獲弩飛投資授權刊登，原標題為《戰爭改變投資邏輯 》
免責聲明：本網刊載的所有投資意見，只可作參考用途。讀者在作出投資決定前理應審慎，並主動掌握市場最新狀況。若不幸招致任何損失，概與本網無關。而本集團旗下網站或社交平台的網誌內容及觀點，僅屬筆者個人意見，與本集團立場無關。本集團旗下網站對因上述人士張貼之資訊內容所帶來之損失或損害概不負責。
