其實當價值股同指數分道揚鑣咁行嘅時候，我一直喺度問，究竟個調整係risk off定係sector rotation。由於指數持續向下嘅時候，價值股都創新高，所以先當係sector rotation咁樣揸實啲電力同埋基建股。直到三日前，基建股出現插水，佢嘅調整比預期凶狠，硬食咗一棍，開始有risk off燒到去價值股嘅感覺，由於心目中都係用hit and run嘅做法，所以即刻放晒所有基建、電力、銀行、保險、電訊嘅價值股，大量增加現金。
其實唔單止資金流動嘅影響，即使喺估值上都有誘因放貨。以電力股為例，原本嘅估值方法都係用PB去計，但係近排嘅revaluation主要係靠將未來幾年新能源嘅capacity透過DCF加埋落去整體估值。例如有投行將華潤電力（836）新舊能源佔比1:3嘅capacity計到3:1嘅估值，我覺得係合理嘅，但係revaluation最容易嗰part已經反映咗（由只係睇現在嘅估值轉為睇未來五年嘅估值）。
大市連跌咁多日，唔排除有個小型嘅反彈，我相信今次嘅反彈會係增長股帶動，重點有機會係醫療板塊。由於唔清楚科技行業係以大型定係小型公司帶動，所以我先用7226做一個大包圍。但係今次反彈比較大嘅conviction係來自藥明生物（2269）同埋信達生物（1801），因為佢哋同行嘅公司已經率先突破下降軌，喺上面等緊佢哋，而身為龍頭嘅佢哋值得重注博下反彈。
＊文章獲 弩飛投資 授權刊登，原標題為《沽清價值股，以醫藥股進攻》
免責聲明：本網刊載的所有投資意見，只可作參考用途。讀者在作出投資決定前理應審慎，並主動掌握市場最新狀況。若不幸招致任何損失，概與本網無關。而本集團旗下網站或社交平台的網誌內容及觀點，僅屬筆者個人意見，與本集團立場無關。本集團旗下網站對因上述人士張貼之資訊內容所帶來之損失或損害概不負責。
