現契物業翻按，意思係指物業目前並沒有按揭，樓契係業主手，並打算將物業重新抵押到銀行申請按揭貸款。
最近友人打算將現契物業到銀行翻按，而銀行要求睇樓，無奈租客唔配合以致出現障礙。而事實上，現契物業翻按並非所有銀行都需要睇樓⋯⋯
假業主案 自從出現名城假業主案後，不少銀行對於現契物業申請翻按都會要求業主開門睇樓，且不論物業係自用抑或出租。
如果現契物業係出租當中，業主可以做定功課，可以唔使睇樓嘅銀行申請翻按，以免租客唔配合而影響按揭。
而現契物業出現假業主風險較大，因為當物業有按揭未還的話，樓契會作為抵押品按咗比銀行由銀行保管。
當出售物業時或將物業轉按時，如果物業仲有按揭未還，轉按或成交時律師樓會同按揭銀行對數，過程可以確保賣家或申請人係「真業主」身份。
樓契按比銀行最安全 當物業供斷咗無按揭時，樓契會由業主自行保管。
理論上將樓契放入保險箱最為安全，奈何保險箱係香港嚴重供不應求，等保險箱時間可能仲耐過等到間公屋。
所以筆者經常建議客人將物業抵押比銀行做按揭，盡量唔好拎完疊樓契在手，樓契按比銀行肯定比放係屋企安全得多。起碼唔使擔心屋企水浸、火燭或者打風個陣會整唔見疊樓契，如果缺失樓契正本，會影響日後申請按揭及出售物業。
至於按揭貸款額豐檢由人，少至幾十萬及多至過千萬亦可，視乎自身需要。
如果打算借少少順便將樓契交比銀行保管，以現時實際按息低於2%，計起上嚟個利息成本可能仲平過租保險箱的費用。
相關
本文所提供的信息僅供一般參考之用，並不構成任何個人化的投資勸誘或建議。作者沒持有以上提及的股票。 HK MoneyClub (www.hkmoneyclub.com)